Erotic Underground

Erotic Underground. Dave Bunell

Un regalín de vienres... a ver si val p'animar a la xente -mañana aconceyámonos na FESPA-, que vos preste, vémonos!.

> http://www.eroticunderground.net/

Gracies, Nuno!

Asamblea Estraordinara de la FESPA pal 24 d'abril de 2010

Convocatoria de l'Asamblea Estraordinaria de la FESPA pal 24/04/10. Pica nella pa vela más grande.

De conformidá colo afitao nos artículos 25, 26 y 27 de los Estatutos de la Federación d'Espeleoloxía del Principáu d'Asturies (FESPA) (BOPA de 13/04/05) y en nome de D. PABLO SOLARES VILLAR, Presidente de la Comisión Xestora de la citada Federación, pola presente convócase con calter URXENTE a TOOS los deportistes y clubes asturianos federaos nel presente exerciciu 2010 a una Asemblea Estraordinaria que va tener llugar el próximu día 24 d'abril de 2010, nel Salón d'Actos del Edificiu de Federaciones Deportives del Principáu d'Asturies (Avda. Julián Clavería, 11 d'Uviéu), a les 17:00 hores en primer convocatoria, a les 17:15 hores en segunda convocatoria y a les 17:30 hores en tercer y última convocatoria, col siguiente

ORDE DEL DÍA

1. Intervención alministrativa de la Federación d'Espeleoloxía del Principáu d'Asturies (FESPA), alcordada por Resolución de 29/01/2010 de la Conseyera de Cultura y Turismu del Principáu (BOPA de 16/03/2010).

2. Presentación de la Comisión Xestora de la FESPA, nomada por Alcuerdu de 23/03/2010, del Direutor Xeneral de Deportes del Principáu.

IMPORTANTE:

- Nun va haber vez de ruegos y entrugues dáu'l calter puramente INFORMATIVU y dafechu abiertu a tolos clubes y deportistes federaos que tien la xunta.

- A esta Asamblea Estraordinaria tienen previstu asistir representantes de la Direición Xeneral de Deportes de la Conseyería de Cultura y Turismu del Principáu d'Asturies.

Convocatoria de l'Asamblea Estraordinaria de la FESPA pal 24/04/10.

Ensin barreres

Cueva la Colluvina (Llanes-Asturies). Semeya: Santi (GE Diañu)

El pasáu domingu tocó visita a la Cueva la Colluvina (Llanes), xente mayuco y menudo del Gorfolí, l'Escar y de “A flote”, p'acompañar a Alex, un deportista que gracies al so esfuerzu ye quién pa practicar dende'l fútbol a la espeleoloxía, siendo yá campeón d'España de natación. ¡Norabona, Alex!.

> Más semeyes ya info na páxina de los collacios del GE Diañu. Gracies, Santi!.

La Direición Xeneral de Deportes noma a la Comisión Xestora de la FESPA

Notificación de la DXD a los clubes asturianos. Pica nella pa vela más grande

IMPORTANTE:

La Direición Xeneral de Deportes de la Conseyería de Cultura y Turismu acaba notificar oficialmente a tolos clubes el nomamientu de la Comisión Xestora de la Federación d'Espeleoloxía del Principáu d'Asturies, siendo'l collaciu Pablo Solares Villar (SEB Escar) el so Presidente, con toles competencies que-y otorguen la llexislación deportiva en vigor y los propios Estatutos de la Federación.

Gracies Javier, por apurrimos l'avisu!.

Los Alcuentros de Corvera nun pudieron salir meyor!

IV Alcuentros de Deportes d'Aventura. Les Vegues, Corvera 2010

A los más de cien asistentes en cauna les xornaes y a los collacios del Diañu, ¡gracies!. Eso sí ye trabayar a modo:

"Aventuras en Las Vegas" (El Comercio, 27/03/10).
"Espeleología: aventura profunda" (LNE, 28/03/10).
"Al Filo de lo Imposible estuvo en Las Vegas" (El Comercio, 28/03/10).
"Orviz es un apoyo para Edurne" (El Comercio, 29/03/10).

Amigos y Deportistes Discapacitaos Amantes de la Naturaleza (ADDAN)

Belén, merguyando en Javea. Aletea cola ayuda de guantes palmeaos. Semeya: Carmen Portilla

Va tiempu yá-y dedicáramos una entrada a la nuesa amiga Belén Molina, una persona esceicional que, tres d'un pergrave accidente de tráficu, siguió trabayando incansable y vital como siempre. Hai un par d'años creó una asociación empobinada a promocionar los deportes d'aventura ente persones con estremaes incapacidaes motrices: Amigos Deportistas y Discapacitados Amantes de la Naturaleza (ADDAN).

Más, na guapa entrada que-y dedica "La Xefa" Carmen nel so blogue: "Baxo l'agua, toos somos discapacitaos"... gracies a les dos!.

El hundimiento de la FASE

Yá ye oficial... tres de la recién intervención de la Direición Xeneral de Deportes de la Conseyería de Cultura, la Federación d'Espeleoloxía del Principáu d'Asturies (FESPA), ye xestionada y representada per una Xunta Xestora que tien como cabezaleru a Pablo Solares (SEB Escar).

Agora, quédanos un trabayu escomanáu per delentre, mirando d'iguar y auditar la situación financiera y de xestión de la FESPA, la vieya FASE. Agora toca "llimpiar la casa", pa poder aportar a la so normalización institucional, un llabor n'andecha al que -dende yá- convidamos a tolos espeleólogos asturianos, porque esa casa ye de toos nosotros, y porque esta ye una obligación de la que cuidamos dengún de nós habría desertar. Sabemos trabayar n'equipu y sabemos que toos y toes somos quiénes pa facer aportaciones valibles pal común na medida les posibilidaes de cada cual.

Sicasí, dende Espeleoastur, queremos dar la nuesa candial norabona a tolos collacios y collacies que trabayaron bien duro p'aportar fasta equí. Gracies a tolos "axuntaos". Gracies pol vuesu enfotu, trabayu y sofitu arrogantes. Gracies pol vuesu aliendu.

Y agora, ¡a trabayar!.

IV Alcuentros de Deportes d'Aventura. Corvera, 2010

Cartel de los IV Alcuentros de Deportes d'Aventura en Corvera, Asturies (2010)

Ya pasaren bien d'años dende aquel 2001 nel que se celebraren los caberos Alcuentros organizaos polos collacios del G.E. Diañu Burlón, en Corvera. Pero los Caballeros de Bormonfoyu vuelven con rixu:

El vienres 26 de marzu a les 19 h. Pablo Solares, coles espectaculares foces asturianes; a les 20 h. Enrique Ogando (Zape) coles cavidaes de México y Patagonia; el sábadu 27 de marzu a les 19 hores, Xesús F. Manteca (Teca) cola película sobre les últimes esploraciones na cavidá somorguiada más importante d'Europa (El Pozo Azul: Beyond the Limits), y a les 20 hores, Carmen Portilla cola so personal y privilexada visión de l'Antártida.

Los Alcuentros van tener llugar los díes 26 y 27 de marzu nel centru Tomás y Valiente de Las Vegas (Corvera) (Ver mapa) y la entrada será llibre y de baldre.

Gracies, collacios!.

Tunnel vision: Martyn Farr n'El Pozo Azul

Semeya: Martyn Farr

Interesante artículu de Martyn Farr sobre los trabayos d'esploración n'El Pozo Azul (Burgos), en Dive Magazine.

Gracies, Poli!

La Conseyería de Cultura y Turismu intervién la Federación d'Espeleoloxía del Principáu d'Asturies

Notificación del alcuerdu d'intervención de la FESPA. 29/01/10

La Direición Xeneral de Deportes de la Conseyería de Cultura y Turismu notificó apocayá a los clubes d'espeleoloxía asturianos la Resolución de 29/01/10, pola que alcuerda intervenir alministrativamente la Federación d'Espeleoloxía del Principáu d'Asturies, suspendiendo los sos óranos de gobiernu y, en concreto, al so Presidente y Xunta Direutiva. Esta resolución, firmada pola Conseyera Dª. Mercedes Álvarez González, faculta amás a la Direición Xeneral de Deportes pa tomar les medíes necesaries "col envís de garantizar l'acondada xestión de la Federación y salvaguardar los intereses de los deportistas y clubes adscritos a ella", pa lo cual va constituyise una Xunta Xestora.

Ye esta una bona anuncia qu'aguardábemos hai bien de tiempu y naguamos por que, una y bones, seyamos quiénes agora ente toos p'acabar cola irregular y pergrave situación de la nuestra federación. Norabona, collacios!

Gracies a Javier Sta. Eugenia del Esperteyu y a Pablo Solares del Escar pola anuncia.