Fecha la primer travesía integral del Sistema Arañonera (C7-Cueva de Santa Elena)

Croquis de la Primer Travesía Integral del Sistema Arañonera. Espeleo Club de Gràcia (Bracelona). Pica nelli pa velu más grande.

Al tercer intentu y tres años depués d'empatar la cavidá denomada como C-7 col Sistema Arañonera, fízose la primer travesía integral d'esti gran sistema pirenaicu, allugáu na Sierra de Tendeñera, na comarca del Sobrarbe (Huesca-Aragón). La travesía ente la C-7 y la Cueva de Santa Elena, foi un bon colofón pal Campamentu Internacional Arañonera 2006, coordináu pol Espeleo Club de Gràcia (Barcelona). Un equipu de 2 persones (1 miembru del ECG y 1 collaciu italianu) yera quién pa completar esta primer travesía nún ataque de 24 hores, ente los díes 11 y 12 d'agostu de 2006. Esta ye la mayor travesía que pue facese nel Sistema Arañonera ensin utilizar téuniques d'espeleomerguyu. La travesía tien un desnivel ente boques de 1.294 metros, allugándose'l puntu más fondero'l percorríu a -1.305 m de fondura dende la C-7, siendo'l so desendolcu superior a los 9,8 Km. El desnivel acumuláu ta penriba los 1.600 metros, pola mor de delles remontaes. Gracies, Evaristo Quiroga.

La noticia equí, dientro la páxina l'Espeleo Club de Gràcia.