¡Cueves en Marte!

Les posibles cueves de Marte. Semeya: Sonda Espacial Odyssey

Siete pozos na superficie de Marte paez que dan accesu a cavernes soterrañes, los llugares que seique seyan los más afayadizos pa buscar señales de vida nesi planeta. Los investigadores fueron quién pa char una güeyada a los pozos marcianos, gracies a la sonda espacial "Mars Orbiter Odyssey". Nun fueron quién pa ver lo fondero en seis d'ellos, pero nel séptimu pozu, una seición de suelu allumada directo pela lluz solar, suxer una fondura mínima de 130 metros. Los escáneres térmicos aidaron a afitar que les cavidaes ye probable den accesu a sistemes soterraños, al traviés de boques d'unos 100 a 250 metros de diámetru. L'equipu d'investigación presentó l'afayu nún conceyu del Lunar and Planetary Institute la selmana pasada en Houston (Texas). Phil Christensen, de la Universidá Estatal d'Arizona en Tempe, encabeza'l proyeutu d'imaxe térmica del Proyeutu Odyssey. Destacó que les temperatures nes boques de les cavidaes permanecen más constantes que na so rodiada, espuestes a les más dures temperatures de la nueche marciana. "Estos pozos permanecen relativamente caldios pela nueche", dixo. "Ello suxer que tamos mirando a lo fondero d'una cavidá qu'atrapa'l calor del día". "Pa un observador na superficie de Marte -añadió- sedría una perguapa y espectacular vista. Podríes tar al borde y mirar abaxo, pero seique nun sedríes a ver lo fondero". Les cavidaes marcianes atópense a lo llargo centenares de kilómetros, al llau de la segunda mayor montaña de Marte, Arsia Mons, cerca'l Valles Marineris. (ver el mapa de Marte).

> Esbillao de: News.nationalgeographic.com

Gracies a Nuno y a Profundezas. Y una alcordanza: yá va bien d'años (más de diez, seique), el nuesu collaciu espeleólogu y físicu astur-cubanu Julio Valdés, trabayaba teorizando sobre esta posibilidá (esto ye, la esistencia de cueves en Marte y lo afayadizo d'elles pa buscar signos de vida)!!!. Entóncenes, lo que mos contaba Julio acerca los sos trabayos paecíanos poco menos que cencia-ficción... ¡les vueltes que da'l mundu y les que dará entá!. Julio Valdés, asturianu por derechu propiu y miembru vitaliciu del G.E. Gorfolí, ye anguaño investigador nel Institutu de Teunoloxíes de la Información del National Research Council de Canadá, en Ottawa. Un abrazu fraternu, Julio, dende esti llau de la mar.