Seis fallecíos al asfisiase nún tínganu volcánicu en Tenerife (Canarias)

Entrada al tínganu volcánicu conocíu como la "Cueva de los Cochinos". Semeya: Axencia EFE

Los equipos de rescate atoparon ayer domingu los cuerpos de seis escursionistes que morrieron asfisiaos na "Cueva de los Cochinos", allugada nel camín de Cuevas Negras nel municipiu de Los Silos (Tenerife-Canarias). Los seis formaben parte d'un grupu de 30, qu'entraron na cueva'l pasáu sábadu día 10. Toos ellos pertenecíen a dos grupos venceyaos al Institutu d'Astrofísica de Canarias (IAC) y l'Asociación Tinerfeña de Amigos de la Naturaleza (ATAN).

Too indica que los escursionistes accedieron a la galería por equivocación, cuidando que yera otru tínganu cercanu con boca d'entrada y salida, conocíu como "El Buen Viaje", nel camín de Cuevas Negras, nesta mesma zona de "Piedra de los Cochinos".

A les 16:40 h. del sábadu, ún d'ellos foi quién pa salir de la cavidá y dar la voz d'alarma, avisando d'un forte fedor a gas na galería inundada onde se metieran por equivocación. Más sero, munchos de los escursionistes salieron pol so propiu pie ilesos, pero once d'ellos tuvieron ser rescataos na madrugada d'ayer con severes dificultaes respiratoies, siendo treslladaos al hospital. Los equipos de rescate trabayaron más de 20 hores fasta atopar los cuerpos de los seis fallecíos, a más 1.400 m. de la entrada la cavidá. L'accesu foi muncho bien complicáu, a causa la falta d'osíxenu y l'acumulación de gases. Abondos d'estos tínganos fueron acondicionaos nesta zona de Los Silos yá nel sieglu XIX a la gueta d'agua, y dellos tan tomaos de gases tósicos, pola mor l'actividá volcánica.

El senderu de Cuevas Negras ye ún de los recorríos senderistes más guapos y populares d'esti espectacular municipiu tinerfeñu de Los Silos, al noroeste la islla. Nesi senderu faise preciso travesar un tínganu acondicionáu pa la recoyida d'agua conocíu como "El Buen Viaje", que seique foi lo que llevó a tresmanar el camín al grupu d'escursionistes, dando llugar a esta murnia traxedia.


El barrancu de Cuevas Negras, en Los Silos (Tenerife).


La entrada al tínganu "El Buen Viaje", tres del cual y nunos 20 minutos, llégase a la zona conocida como Piedra de los Cochinos.


Nel interior del tínganu de "El Buen Viaje", nel senderu de Cuevas Negras. Semeya: ATAN

Más información en:

>> Google News.

>> Más prensa:

El Día de Tenerife.
Diario de Avisos. Tenerife.
La Opinión. Tenerife.
El Mundo-La Gaceta de Canarias. Tenerife.