Sac Actum-Nohoch nah Chich (154.783 m.): récord del mundu de desendolcu somorguiáu

El Sistema Sac Actum, en 2004. Pica na imaxen pa vela más grande.

Tres cuatro años de trabayu, el pasáu 25 de xineru de 2007, Steve Boagerts y Robbie Schmitter del Quintana Roo Speleological Survey fueron quién pa empatar a la fin el Sistema Sac Actum col Sistema Nohoch Nah Chich, dando llugar al sistema somorguiáu más llargu'l mundu, con 154.783 m. de desendolcu. De los 152.975 m. de desendolcu total del Sistema Sac Actum, 1.808 m. son de cueva aeria. Supérase d'estamiente l'anterior récord del Sistema Ox Bel Ha (146.761 m.), esploráu pol Grupo de Exploración Ox Bel Ha, tamién nel Estáu mexicanu de Quintana Roo, na Península'l Yucatán. Anguañu, les dos cueves más llargues de México son estos grandes sistemes somorguiaos, siendo'l Sistema Sac Actum-Nohoch Nah Chich la novena cueva más llarga'l mundu, incluyíos sistemes aerios.

La conesión de los dos sistemes tuvo llugar ente la zona de Muul Ha en Sac Actum y el Cenote Manati (Casa Cenote) en Nohoch Nah Chich. Cenote Por One, un amenorgáu y poco atractivu furacu, allugábase ente eses dos zones. Necesitáronse ocho meses d'esploración "a la inglesa", coles botelles montaes a los llaterales ya incluso ensin montar dafecho, pa empatar esti cenote col Sistema Nohoch Nah Chich el 21 de xineru. Y siete díes más d'esploración fueron precisos pa empatar a la fin esti sistema con Sac Actum. El día en que s'algamó la conesión, Robbie Schmitter entró per Muul Ha, equipáu con cinco botelles llaterales, el torpedu (DVP) y ¡una botella xampán!. Steve Boagerts entró pel Cenote Manati col arnés pa montar llateral les botelles y los aperios ensin montar, con 3 botelles, un torpedu (DVP) y una cámara dixital; nesta inmersión, llevó les botelles montaes a los llaos 45 minutos y otros 45 minutos ensin montar dafecho. ¡Caún d'ellos terminó la so inmersión en el puntu d'alcuentru previstu al mesmu tiempu!. Más información:

>> La noticia, en WCN
>> Páxina del Quintana Roo Speleological Survey
>> Páxina del Grupo de Exploración Ox Bel Ha