N'alcordanza los collacios fallecíos nel peor accidente espeleolóxicu de la historia británica

Finxu n'alcordanza la traxedia de Mossdale Caverns nos páramos de Yorkshire Dales, (Inglaterra).

El 24 de xunu de 1967, diez espeleólogos entraron nel sistema de Mossdale Caverns (Yorkshire Dales, Inglaterra). Tres hores más sero, cuatro d'ellos dieron la vuelta y la última en salir llegó xusto pa decatase que la entrada taba yá dafecho somorguiada pola mor de la lluvia recién que desbordara'l Mossdale Beck. Decatóse darréu de que los seis collacios que quedaran dientro la cueva taben daveres en peligru y corrió cuatro kilómetros campu través pelos páramos de Yorkshire pa dar l'alarma. Los equipos d'espeleosocorru aportaron al llugar, pero l'altu nivel de les agües torgó-yos l'accesu a la cavidá.

Les agües del Mossdale Beck deriváronse llonxe la entrada la cueva faciendo una presa. Ya incluso entós, tampoco'l rescate nun pudo comenzar pola mor l'altu nivel del agua dientro'l sistema. Nun foi fasta'l día siguiente que los espeleosocorristes pudieron entrar na cueva, atopando los cuerpos de cinco espeleólogos na zona conocida como "Far Marathon Crawls". El sestu foi atopáu al otru día. Los cuerpos dexáronse allí y, en 1971, los espeleólogos fallecíos fueron sepultaos polos sos collacios del USLA (Leeds) en "The Sanctuary", una sala na zona denomada "High Level Mud Caverns", col consentimientu les sos families. Les autoridaes decidieron sellar con cementu l'accesu a la cavidá, pero volvió abrise más sero.

Una placa nes peñes xunta la entrada principal al sistema diz:

IN EVERLASTING MEMORY FROM THE FAMILIES OF

DAVID ADAMSON AGED 26
GEOFFREY WARREN BOIREAU AGED 24
WILLIAM FRAKES AGED 19
JOHN OGDEN AGED 20
MICHAEL JOHN RYAN AGED 17
COLIN RICHARD VICKERS AGED 23

WHO REST HERE IN MOSSDALE CAVERNS WHERE THEY DIED 24th JUNE 1967

I will lift up mine eyes unto the hills
From whence cometh my strength

Nos páramos nos que se desendolca la cavidá, hai un finxu na so alcordanza, señalando el llugar del sistema nel que s'atoparon los cuerpos de los espeleólogos. La placa d'esti finxu diz:

Mossdale memorial cairn – over the place in the cave where the bodies were found

Esti murniu sucesu mos lu remembra Nuno, dende Lisboa (Portugal).