Ocho llugares asturianos inclúinse pente los 144 que componen el patrimoniu xeolóxicu español de relevancia internacional

Los Cuetos del Trave. Picos d'Europa (Asturies).

Ocho llugares xeolóxicos asturianos incluyéronse na llista de 144 consideraos patrimoniu xeolóxicu español de relevancia internacional, recoyéndose na guía que'l Ministeriu d'Educación y l'Institutu Xeolóxicu y Mineru d'España acaban presentar en Madrid.

Los sistemes kársticos de los Picos d'Europa; la Cueva'l Sidrón (Piloña); el Carboníferu la Fastera Cantábrica (dos puntos en Gamonéu-Cabrales, y otros dos nel Cuera y costa de Llanes); la plataforma y l'arrecife d'Arnao (Castrillón); y los fósiles del Cretácicu Inferior nel ámbar d'El Caleyu (Uviéu).

Los especialistes definieron veinte grandes contextos n'España, y d'aende escoyeron los puntos que meyor los representen. Un proyeutu entamáu en 1999 y que contó cola collaboración de 55 centros universitarios, pente ellos la Universidá d'Uviéu y el Conseyu Superior d'Investigaciones Científiques (CSIC).

> La noticia, en La Nueva España.