Xe Bang Fai, la cueva'l ríu

Galería en Xe Bang Fai (Laos), la cueva'l ríu...

La primer espedición de 10 díes al escomanáu ríu soterrañu de la Xe Bang Fai en Laos, co-dirixida por John Pollack y Bob Osburn, tuvo compuesta por un equipu de cuatro canadienses y cuatro americanos, col sofitu de guíes locales qu'esploraron, topografiaron y fotografiaron 11.000 m (la viniente campaña tiénenla programada pal 2.010).

Les impressionantes semeyes de Dave Bunnell precisaron de 20 disparos estroboscópicos p'allumar les escomanaes galeríes. Pa la topografía usaron láser y compás dixital con estaciones nes que la distancia mínima al siguiente puntu yera de 184 m. y la masima medida d'una sola tirada foi de 350 m. La comunicación ente los topógrafos fízose con walkie-talkies.

El ríu, del que se conocen les boques d’entrada y salida, presentaba en febreru (dómina d’estiax cuando se fizo la esploración), un caudal de 9,8 m3 per segundu y esploróse con kayaks inflables. Pelos monzones (agostu-setiembre) el caudal algama la fantástica cifra de ¡1.000 m3 per segundu!. Ah... y too nesta cueva ye escomanao: al cabu, les arañes miden ¡25 cm!.

Gracies, Nuno!.

> Más info actualizada y semeyes perguapes nel blogue de los nuesos collacios d'Espeleobloc.