El Tribunal Superior de Xusticia de Madrid-y da la razón a la FEE

Sentencia 2.082 de 12/11/08, en Recursu Contenciosu Alministrativu númberu 1105/05, de la Seición Sesta la Sala lo Contencioso-Alministrativo del Tribunal Superior de Xusticia de Madrid.

El Tribunal Superior de Xusticia de Madrid acaba da-y la razón a la FEE nel contenciosu que caltuvo en solitariu mentantu cuatro años el G.E. Gorfolí, escontra la Resolución de 29/07/04 de la Xunta de Garantíes Eleutorales del CSD, desestimando la Resolución de 20/06/04 de la Xunta Eleutoral de la FEE na que s'incluyía como representante l'Asamblea al entós Presidente de la FASE, Juan José González Suárez.

Más allá de l'avezada ultranacional-españolista, simplaya y payota llectura que fain d'esta sentencia dende la páxina web oficial de la FEE (faltes d'ortografía incluyíes), mirando entá de salva-y la cara al agora investíu nada menos que como Representante de la Federación Española de Espeleología en el Principado de Asturias (sic), Sr. González Suárez, -que pola mor d'ello vése que yá nun habría ser el Presidente d'una Federación deportiva Autonómica (l'asturiana), sinón una mena de Virrei de la FEE na fragosa Asturia tresmontana-, la Sentencia abúltamos interesante por delles razones:

1.- La Sentencia perafita qu'una Federación Española (nesti casu, la FEE) nun tien por qué parase a averiguar a quién sienta nes sos Cátedres. Albídrense les consecuencies qu'habríen derivar d'una obligación xeneral nesi sen: diba abrise esa "caxa de Pandora" que ye la grillera mafienta de les Eleiciones federatives deportives n'España. Y eso... meyor nin tocalo.

2.- El Sr. González Suárez yera entós (2004) Presidente de la FASE y, poro, taba sometíu a la normativa asturiana. Sicasí, como reconoz la Sentencia, el Sr. González Suárez taba en situación irregular, magar qu'esa situación nun supunxo dafechu un espediente disciplinariu fasta un tiempu dempués. Y la FEE non podía tener constancia d'ello; ente más otro, porque'l Principáu d'Asturies (Direición Xeneral de Deportes) nun fizo el so trabayu a tiempu, cosa que se deduz de forma tapecío na Sentencia.

3.- Con too y a pesar del nuesu recursu y avisu a la FEE escontra les maniobres en fraude de llei del Sr. González Suárez (retardu a costa fecha de la convocatoria eleutoral asturiana, motivu de posterior espediente y sanción disciplinaria pol Comité de Disciplina Deportiva asturianu), la FEE-y da votu en Madrid (Asamblea FEE de 2004). Y esta decisión de la FEE ye la que'l Tribunal entiende como axustada a derechu. Nun hai más.

Anguaño, la situación na Federación Asturiana (FASE), sigue siendo irregular (cola diferencia (?) qu'agora la responsable habría ser nada menos que la muyer del virrei de la FEE n'Asturies, la Sra. Muñiz Fernández): nun se faen les Asamblees ordinaries preceutives, nin se presenten les cuentes anuales pala so aprobación pola Asamblea, nin se proponen presepuestos, nin se xustifiquen sovenciones énte los federaos, nin hai actividá dala que se conoza fuera los escuros pasiellos de l'Alministración. Y la Direición Xeneral de Deportes del Principáu sigue ensin intervenir (asumiendo y faciendo la correspondiente auditoría financiera y de xestión, como habría ser el so deber llegal), pese a les reiteraes denuncies presentaes pol G.E. Gorfolí.

Persabemos que ficimos lo que teníemos que facer... y tamos arguyosos d'ello!.

> La sentencia, en PDF.