Campaña 2009 Ubiña

Atapecer percima los Puertos d'Agüeria dende la entrada del Pozu FPF-1, na Paré los Cintos . Semeya: Pachu.

El principal oxetivu d'esta campaña foi el Pozu FPF-1, cavidá atopada l'añu pasáu na Paré los Cintos. D'un llau ta la vía "normal" fasta'l meandru y d'otru llau, la vía que per galeríes y pozos de "tubu a presión" volvió a empatar cola vía principal anantia'l meandru (-110). Nun se fue quién a perpasar la estrenchura del meandru a -145 m. na cabecera d'un pozu grande, pero polo menos topografióse too.

Per otru llau, el vienres 7 d'agostu Evaristo y Pachu atoparon otra cavidá na paré a daqué distancia de la FPF-1 y 20 m. más abaxo (1.755 m.s.n.m.) con grandes dimensiones y qu'ensin equipu (namás con frontal) permitió amiyar fasta -65 (ramples). Al otru día siguiente, mentantu Tito y Pachu entraben a mirar de pasar la estrenchura de -140 del FPF-1 y desinstalar, Fane col equipu de fortuna (chandalismu, camiseta térmica, frontal, 90 m. de cuerda, burilador y maza) plántase a -155 m. na nueva cavidá. Les dimensiones siguen siendo grandes (galeríes de +- 20-25 m. d'anchor y 15 d'altor) y con sales con costeros, que pel momentu nun torguen el pasu. A pesar les dimensiones na entrada, nes partes de menos seición, apréciase corriente d'aire y nublina.

La cosa tien bona pinta, anque eso na espeleo ya sabemos que !!!NUN GARANTIZA RES!!!

L'actividá realizóse ente los díes 8 al 16 d'agostu y contó cola participación de:

Justin y Gelu (A. D. Cuasacas)
Fane, Pachu y Tito (G. E. Gorfolí)
Julia Arce Saéz (G. E. Niphargus)
Evaristo (S. E. Hades?)

A esto ya-y podemos denomar "Interclub Ubiña", tres d'esplorar mentantu años Fane y Pachu en solitario...

Gracies, Pachu!.

> Más info y semeyes, equí.