Félix, n'alcordanza

Félix, nel XX Aniversariu de les esploraciones en Picos. Coleutivu Castil-Tortorios. Cantabria, 2007. Semeya: Javier Lusarreta

Félix Gallego Amador fuera presidente del G.E. Castrillón per munchos años y siempre trabayó enforma, arrogante y bonal, pola espeleo de nueso. Representante nes Asamblees de la Federación Asturiana d'Espeleoloxía y miembru del so Grupu d'Espeleosocorru, yera ún de los nuestros, un esplorador: Veigadonga, Carnizosu (atopara la entrada d'esta importante cavidá: "cuando la canal del arreventón veas finalizar..."), Urriellu, Castil, el Sueve, Cantabria (cuando partió un brazu nún de los rescates en Coventosa y entá siguió trabayando ensin gorgutar...), o abriendo cañones per Ponga y Amieva xunto con Gerar, Lolo, Spidi, el Javi'l Trasgu... Félix felleció esti día 8 de mayu de 2009 n'Os Ozcos (Asturies), au vivía y trabayaba ensin escaecer el so amor pol caliar.

Descansa en paz, collaciu, amigu. La to sonrisa candial va quedar por siempre allumando les coraes tapecíes d'esti vieyu país. El camín qu'andasti xunta nós, el to llabor granible, la to alcordanza, nun va perdese no ermo.

Cuandu acuta esa nueche
ensin alboreceres,
apúrreme
el caberu golor de la mimosa,
xunto al pulsar prestosu
de la tierra qu'alienda.
Y sema a los mios pies,
anque nun sientan,
el baltir calecíu
de tolos ochobres que vendrán.

Mª Teresa González, "Ochobre" (1989)

> Más.