Teberga, puntu y aparte!

IV Xuntanza d'Espeleólogos Asturianos. Teberga (Asturies), febreru 2009. Semeya: Rafa Bernardo. Pica nella pa vela más grande.

Sesenta espeleólogos asturianos de los grupos G.E. Gorfolí, G.E. Diañu Burlon, A.D. Cuasacas, G.E. Polifemo, S.E.B. Escar, A.D. Gema y L'Esperteyu Cavernícola Espeleo Club, aconceyámonos en Teberga esti pasáu fin de selmana cola fin de venos y saber los unos de los otros y tamién de los estremaos trabayos d'esploración que tamos desendolcando (ver programa), sacando tiempu entá p'ablucar col llabor na estaya de foces y barrancos fechu por Pablo Solares y los collacios de la S.E.B. Escar; y pa falar de custiones como los entamos topográficos y les importantes ferramientes cartográfiques esparexaes y presentaes por Oscar Cuadrado (G.E. Gorfolí).

Pela so parte, el nuesu collaciu Rupo presentó'l portal Espeleobuceo en Burgos y les esploraciones nes que participamos en El Pozo Azul, Ojo Guareña y les cavidaes somorguiaes pertenecientes al Karst de Orbaneja del Castillo-Bricia (Burgos). Pica nesti enllace pa ver la so perguapa presentación.

Enfotaos en trabayar a comuña pa superar la llaceriosa situación federativa y n'entamar una revolucionaria forma de trabayar y d'organizanos en rede, dando tira a los collacios, esfrutamos d'unes bien prestoses y completes xornaes, nes que nun faltó nin la sidra y l'espectáculu an Cá Narciso, nin la visita al Parque de la Prehistoria de Teberga, nin la muncho bien simbólica y emotiva visita a Cueva Güerta...

Esta Xuntanza va tener continuidá de la mano de los collacios de la S.E.B. Escar y nenguna de les sos ediciones nun fuera posible ensin l'escomanáu llabor d'organización de Fran Solís (G.E. Gorfolí), al que toos-y agradecimos dende lo más fondero y nún cenciellu actu -con imposición d'escarapela y banda-, la so amistá y constancia nestos años escuros, faciendo un impagable llabor de mediación y contautu entre los más de nós. Seique la espeleoloxía asturiana nunca nun-y lo va poder agradecer abondo enxamás... ¡gracies, Fran!.

Tolos qu'ellí tuvimos marchamos col aquel de qu'esta Axuntanza de Teberga sí va marcar un finxu -un antes y un depués- na hestoria de la espeleoloxía asturiana... ¡gracies fonderes a toos y toes!.

> Presentación de "Espeleobuceo en Burgos" (Rupo).
> Galería de semeyes de l'Axuntanza (Rupo).
> Reseña en "Profundezas..." (Rupo).
> "Nueva Era", una valoración de l'Axuntanza (Santi).
> "Axuntanza", una valoración de Cuasacas.
> "Xuntanza", una valoración de Pablo Solares (Escar).