Axuntanza d'Espeleólogos: la barricada escontra la usurpación d'una filosofía

"Naval Xixón a les barricaes". M. Tamargo

L'Axuntanza d'Espeleólogos ye una iniciativa dafecho abierta a toos aquellos espeleólogos asturianos qu'entá esploren y qu'asina entienden la nuesa actividá; una barricada escontra la usurpación d'una filosofía; un abellugu.

La razón que mos lleva a entamar esta iniciativa ye qu'a naide nun se-y escapa el que, d'un tiempu p'acá, la esploración y l’estudiu les cavidaes naturales soterrañes y el so entornu natural y cultural, vien articulándose cada vuelta más al marxe d'anquilosaes estructures de calter vertical, evolucionando de forma natural a un sistema organizacional en rede. Les míseres, fates, cansines y ermes batalles pol poder que carautericen l'actividá nes estructures tradicionales de calter vertical, nun faen otro que consumir fuelgu ensin xacíu, mancándonos muncho mui bien ya impidiendo'l xorecer d'iniciatives fresques y nueves. Consumen una valible enerxía, que bien de nós cuidamos habría empobinase a llevar alantre iniciatives positives y dafecho constructives. La rede ye un sistema horizontal, abiertu; un sistema colaborativu, participativu y flesible que s’articula alrodiu d’oxetivos comunes, ensin tar pa nada condicionáu poles estremaes pertenencies o dependencies de caún: pertenencia a estremaes Alministraciones o Estaos, Federaciones deportives, Universidaes, grupos d’investigación científica, clubes deportivos, asociaciones culturales, instituciones, particulares, etc. Poro, cuidamos que ye mester algamar nuevos espacios de xuntanza ente nós Espacios qu'afalaguen la circulación y l'intercambiu d'información; espacios au s'afiten bonales y abiertes relaciones ente los espeleólogos asturianos; espacios onde l'actividá seya quién pa reverdecer de contino, xenerando proyeutos nuevos; espacios que den vida y aliendu a la nuesa vieya pasión pola esploración...

> Axuntanza d'Espeleólogos.