AVALL solicita a Patrimoniu que protexa la Cueva de Cuartamenteru (L'Arquera, Llanes)

Entrada principal de la Cueva de Cuartamenteru. Semeya: Emilio G. Cea

L'Asociación d'Amigos y Vecinos de Llanes (AVALL) mira de salvaguardar de les obres de l'Autovía'l Cantábricu (A-8), tramu Unquera-Llanes, la Cueva de Cuartamenteru (L'Arquera, Llanes), xunta una casa de postes del sieglu XVI y parte'l Camín Real al so pasu pel llugar. La familia propietaria la finca au s'alluga la cueva y la casa de postes, recibió apocayá un requerimientu de desaloxu nel que se-yos alvierte de que les máquines van entrar na finca el 12 de febreru pa facer los primeros movimientos de tierres. L'actuación na finca inclúi derribar un chalé allugáu a pocos metros de la entrada principal de la cueva, situación que pon en grave riesgu la cavidá, porque la maquinaria pesada va trabayar enriba la entrada principal, lo que podría ocasionar l'esbarrube d'ésta.

AVALL acusa a la Conseyería de Cultura de permitir l'entamu de les obres de l'autovía ensin facer una actuación arqueolóxica del xacimientu, nel que s'atoparan dellos restos arqueolóxicos del Paleolíticu Superior nos años sesenta del sieglu pasáu y tien l'envís de poner estos fechos en conocencia del xulgáu de Llanes.

AVALL yá denunció la situación de la cueva'l pasáu 15 de payares. Anguañu, el Serviciu de Patrimoniu Históricu de la Conseyería entá nun contestó nin fizo nada, afirmando nún escritu del 1 d'avientu que les obres de l'autovía nun afecten a la cueva. AVALL caltién que les obres afectarán a dos de les entraes principales de la cavidá y que'l Serviciu de Patrimoniu faltó a la verdá cuando afirmó nún escritu presentáu al Ministeriu de Cultura el pasáu 15 de mayu que mentantu durare la obra el xacimientu diba escavase dafecho: les obres yá empezaron y naide nun fizo entá escavación dala na cueva.

Cola fin de salvaguardar estos bienes históricos, AVALL presentó énte la Direición de Belles Artes y Bienes Culturales del Ministeriu de Cultura un escritu pidiendo l'actuación inmediata de les instituciones sobre estos bienes.

> Más info na páxina d'AVALL.