Rares cuerdes microbianes nuna cueva somorguiada en Frasassi (Italia)

Semeya de les rares cuerdes microbianes afayaes nes cueves somorguiaes de Frasassi (Italia);.abaxo, la llinia de vida.

No fondero'l sistema de cueves de Frasassi (Italia) fueron afayaes apocayá unes rares cuerdes filamentoses microbianes medrando nel agua frío. Un equipu d'investigadores de la Universidá Estatal de Pensilvania tuvo investigando muestres d'estes biopelícules.

Les cueves d'azufre son un paraísu microbianu, abondos y estremaos organismos viven nesta mena de cavidaes y se manden del azufre como fonte d'enerxía. Jennifer L. Macalady, profesora de xeociencies y el so equipu, tan mirando de perfacer un mapa sobre los organismos que viven nestes cueves y en qué llugares d'elles lo faen, determinando cómo esa distribución se correspuende col entornu xeoquímicu.

Nel trescursu la so investigación, atoparon una forma de biopelícula anantia desconocida, medrando nun requexu d'un llagu probe n'osíxenu. "Los espeleólogos atoparan estes rares biopelícules", diz Macalady. "Asina que-yos pedimos que mos apurrieran una muestra".

El sistema de Frasassi allúgase al norte de Roma y al sur de Venecia y les sos cavidaes son asemeyaes a les cueves de Carlsbad y Lechuguilla, en Nuevo México; pero mentantu nes cavernes americanes l'azufre vien de les reserves de gas natural y petroleu, nes cueves italianes la fonte l'azufre ye una capa gordo de yelsu que xaz so'l sistema.

L'equipu d'investigación secuenció l'ADN la muestra y analizó con precuru los resultaos ensin atopar secuencia dala que correspuenda a organismos conocíos productores de metanu o que lu osiden. Pela contra, sí constataren que cerca la mitá los organismos d'eses cuerdes son bacteries, y que la otra mitá pertenez a otru grupu d'organismos unicelulares llamaos arquees. Los investigadores identificaron la mitá les bacteries como reductores de sulfatu, microorganismos que convierten sulfatos en sulfuros pa obtener enerxía. De les arquees, más de la mitá tan venceyaes con cierta mena d'organismos polo xeneral presentes nos sedimentos de les profundidaes marines, y d'ellos nun se sabe cómo obtienen la so enerxía, anque siempre s'afayen en llugares ensin osíxenu o perprobes n'O2.

La muestra estudiada de biopelícula con forma cuerda tien cinco centímetros de llargor y mediu centímetru de diámetru. Les imáxenes de tan singular biopelícula obteníes mediante microscopiu amuesen que dellos de los organismos unicelulares tienen formes que-yos permiten enganchase unos con otros, y dellos tienen amás ganchinos. Nun se sabe por qué eses "biocuerdes" tienen forma tala. Los microorganismos que les formen seique segreguen dalguna sustancia pegañosa que los caltién xuntos.

Lo que los investigadores sí saben ye que l'allugamientu au xorrecen estes cuerdes amuesa una perbaxa disponibilidá d'enerxía (considerando que l'entornu yá ye probe n'enerxía). Nesti llugar sólo son quién pa caltener un crecimientu perdespacín. Les cuerdes algamen llargores d'ún a dos metros, y les dataciones con radiocarbonu dan-yos una edá estimao de 1.000 a 2.000 años.

Gracies, Teca!.

> Más información en: Scitech News.