El Serviciu de Proteición Civil del Gobiernu de Cantabria cobrará dende esti añu los rescates

Simulacru de rescate del Serviciu de Proteición Civil de Cantabria. Semeya: Daniel Pedriza

El Serviciu de Proteición Civil del Gobiernu de Cantabria cobrará dende esti añu los rescates n'accidentes de montaña o d'espeleoloxía si l'accidentáu nun fizo casu d'una alerta meteorolóxica qu'incrementaba'l riesgu l'actividá.

Nos caberos años, el Gobiernu de Cantabria introdució cambeos na so llexislación pa cobrar el coste los rescates nos accidentes consecuencia d'una neglixencia de los deportistes o si fuere una actividá necesitada de permisu oficial, ensin qu'esa autorización fuera obtenida.

Como otres alministraciones, Proteición Civil de Cantabria atiende cualisquier emerxencia ensin coste dalu pal interesáu si se trata d'un casu fortuitu o de fuerza mayor, ensin haber dolo nin neglixencia por parte l'accidentáu.

La Llei de Medides Fiscales y de Conteníu Financieru pa 2009, introduz una nueva esceición a esi principiu xeneral de rescate gratuitu: "En casu dalu tarán exentes aquelles intervenciones realizaes en situación d'avisos a la población de fenómenos meteorolóxicos adversos n'actividaes que pueden conllevar un incrementu del riesgu deriváu d'esa meteoroloxía adversa".

La Llei habilita al Gobiernu de Cantabria pa cobrar esa tasa cuando se presten "servicios de rastréu, salvamentu y rescate de persones en dificultaes como consecuencia d'emerxencies o accidentes de tráficu, atención en cueves y cavidaes (espeleosocorru y rescate vertical), fundimientu o esbarrumbe d'edificios y obres civiles ya inundaciones".

La norma afita'l coste d'esos servicios en 1.639 euros por cada hora d'usu del helicópteru de Proteición Civil; 500 euros por seis hores d'asistencia del equipu d'espeleosocorru, más otros 100 euros por cada hora adicional fasta'l final del rescate; y 100 euros pol establecimientu d'un dispositivu de búsqueda y rescate, más otros 50 euros por cada hora adicional.

Amás, establez que cada hora o fraición de trabayu d'una dotación completa d'un Parque de Emerxencies costará 328 euros.

Gracies pol avisu, Nuno!!.

> La noticia, equí.
> Más info na páxina del Espeleosocorru Cántabru.