Los servicios d'emerxencia asturianos estudien cobrar los rescates en casu neglixencia

Preparación de les V Xornaes Téuniques de Coordinación d'Emerxencies nel Principáu d'Asturies.

Va cinco años, Asturies, Cantabria y Castiella y Lleón firmaren un protocolu de collaboración pa facer intervenciones enxunto nos rescates de montaña. D'entós p'acá, les tres comunidaes celebren unes Xornaes Téuniques de Coordinación d'Emerxencies.

La V edición d'estes Xornaes, celebrada el 27/05/09 en Cuadonga (Cangues d'Onís-Asturies), pretendió «formar, preparar y poner a puntu los efeutivos pa cuando haya qu'intervenir».

Los efeutivos que participen nos rescates ponen en común los recursos que tienen les tres comunidaes y los protocolos d'actuación en situaciones d'emerxencia. Asina, Cantabria compartió la so esperiencia nel cobru de la tasa por rescates: tendrán de pagar tases los que practiquen actividaes de riesgu en situaciones de fenómenos alversos previamente anunciaos, los qu'entren nuna cueva ensin el permisu correspondiente y, dientro d'ella, sufran dalguna lesión que suponga movilizar a los servicios d'emerxencia. Según los espertos, éstes son «circunstancies oxetives pa poder determinar que la tasa ye aplicable». Sicasí, nun se descarta ampliar estos supuestos si s'aprecia imprudencia que motive'l rescate n'otros supuestos.

Pela so parte, los xerentes en materia de seguranza de cada Comunidá Autónoma participante, debatieron aspeutos institucionales, como la propuesta del Ministeriu l'Interior de poner en marcha una nueva Llei de Proteición Civil, les redes de comunicaciones o estos aspeutos rellacionaos coles tases en rescates.

> Más info: El Comercio.

Gracies, Zape!.