Campaña 2009 del IEV nel seutor Trabe-Amuesa de los Picos d'Europa

Campu Base del IEV mentantu la Campaña 2009 nos Picos d'Europa (Asturies). Semeya: Damiá Marset.

Como cada añu l'Interclub Espeleo Valencianu (IEV) sigue coles sos esploraciones nel Macizu Central de los Picos d'Europa, esta campaña centraos nel Abisu'l Xelu (JA18/19) . La JA18/19 viene dende l'añu 2007 siendo'l so principal oxetivu, que cola punta d'esploración a -700 m de fondura conviértese nuna candidata a empatar col Sistema'l Trabe yá que sólo 80 m de desnivel separten les dos torques.

Esti añu pola mor d'una estrenchura que torga'l pasu en punta y a dellos problemes cola comunicación na cavidá (imprescindible pa progresar pelos caberos 150 metros de desnivel de la torca, yá que nesi puntu y poles sos dimensiones yá fueran dellos los equipos que salvaron de les brutales xorrecides d'agua que se xeneren), foi dafecho imposible perfacer l'oxetivu d'empatar col sistema. Esta xunión nun diba suponer más fondura pal Trabe yá que la JA18/19 ye boca inferior, pero sí aumentaría el so desendolcu.

L'Interclub Espeleo Valencianu (IEV) convida a tolos collacios/es que quieran participar xunta ellos na viniente campaña "Picos 2010" y poder facer bona espeleo como la que mos ufren estos Picos d'Europa.

> Más info y semeyes, equí.

Gracies, Damiá!