Los servicios d'emerxencia del Principáu van cobrar los rescates por neglixencies dende 2010

L'helicópteru de Bomberos d'Asturies nos Picos d'Europa.

Les imprudencies en monte dientro les llendes d'Asturies podrían pagase l'añu viniente. El Principáu estudia la fórmula xurídica pa incorporar, na llei d'acompañamientu de los presupuestos de 2010, la nueva ordenanza pa la aplicación de tases nos rescates nos qu'hubiere neglixencia por parte la víctima. L'oxetivu ye claru: gravar a los que, por exemplu, acudan al monte ensin tener en cuenta les inclemencies del tiempu, o ensin tar preparáu o equipáu de forma acondao. «La xente tien de ser consciente de que nun se puen correr esos riesgos porque tamién se ta poniendo en peligru la vida los profesionales de los estremaos equipos d'emerxencia que tienen de salir a rescatalos», dixo la Conseyera de Presidencia mentantu la so visita a Cangues d'Onís.

María José Ramos reconoció que la so intención ye poder aplicar estes nueves tarifes l'añu viniente, anque almitió tamién qu'entá han salvase dellos trámites alministrativos pa poder conseguilo. «Tamos na parte del estudiu xurídicu y del trabayu previu, pero entá hemos saber si va ser dable incorporalo nos presupuestos».

Pero una y bones en vigor la ordenanza, el so desendolcu tampoco nun va ser un camín de roses. Anguaño sólo disponen d'un reglamentu d'eses carauterístiques Cataluña y Cantabria, anque nesta cabera entá nun s'aplica. El mayor pilancu: habrá ser un xuez quien diga si les víctimes actuaron de forma neglixente o non. En cualisquier casu, dende'l Principáu entienden que «la idea ye válida» y tienen l'envís de seguir avanzando nella, porque «los ciudadanos han ser conscientes del peligru y les consecuencies».

La idea planteóse yá'l pasáu mes de mayu nel marcu les V Xornaes Téuniques de Coordinación d' Emerxencies de les tres comunidaes autónomes qu'aporten tarrén al Parque Nacional de los Picos d'Europa, au se dan la mayor parte los rescates de montaña. D'entós p'acá, el Principáu vien mirando pal exemplu de Cantabria, au la llei entró en vigor nel mes de xineru y, anque entá nun s'aplicó en casos reales, cuenten con una relación de tarifes: 100 € pol establecimientu d'un dispositivu de rastréu o búsqueda, y 50 € más cada hora; pola salida de la dotación completa d'un parque d'emerxencies (cuatro bomberos) la tarifa va salir por 327,90 €/hora y, por un equipu d'espeleoloxía (alredor de quince persones), la víctima pagaría 500 € hasta les seis primeres hores, con 100 € más cada hora a partir de la séptima.

La Conseyera responsable de los Servicios d'Emerxencia del Principáu d'Asturies insistió una vuelta más en que l'aplicación d'esa mena de tases nos rescates «nun tien envís recaudatoriu», anque sí quiso concienciar a la población de la necesidá de «facer un buen usu de los recursos públicos», que suponen un importante desembolsu pa los contribuyentes. Y, como exemplu, recordó que'l serviciu d'un helicópteru medicalizáu xunto a dos aeronaves pa los tres años que vienen, va supone-y al Principáu una inversión de 8,7 millones de euros.

> Noticia esbillada d'El Comercio. Gracies, Zape!.