Cultura decreta la proteición del entornu la Cueva d'Entefoces (Morcín)

Cabeza d'Entefoces (Morcín)

Los grabaos paleolíticos de la Cueva d’Entefoces (o Cueva'l Molín), en Morcín, declarada Bien d’Interés Cultural (BIC), va contar con un entornu de proteición col oxetivu de favorecer la so conservación, según informa’l diariu "La Nueva España". Esti entornu va tar delimitáu, pel norte, por La Ponte, incluyendo la Cueva los Moros; pel sur, hasta’l ríu que bordea La Foz; pel este, arrodiando’l pueblu hasta la Peña Manteca; y pel ueste, hasta’l camín real.

La Cueva d’Entefoces destaca poles pintures de dos venaos y un caballu dataos de la época Magdaleniense, ente 15.000 y 8.000 años enantes de la nuesa era. Ta situada al pie del desfiladeru que talla’l ríu Riosa, a unos tres metros sobro’l nivel del cauce y nella hai señales de qu’hubo otres pintures que nun llegaron a los nuesos tiempos.

N’escavaciones feches na década de los 80, alcontráronse dellos niveles de Magdaleniense inferior cantábricu y ente'l material recuperáu destaca una cabeza humana tallada nun cantu de cuarcita, un asta de venáu decorada y un bloque con grabaos lliniales.

Esta cueva ye un exemplu más de la rica variedá cola que cuenta la zona del Mediu Nalón d’espacios con restos paleolíticos, cola peculiaridá de que ye la única d'esti tipu que s’alcuentra nos conceyos de les comarques mineres.

> Noticia esbillada d'Infoasturies.com