Peltó, n'alcordanza

Teca, Peltó ya Isidro nel Café Dindurra de Xixón, el 19/09/06.

José Mª Peláez Prieto, Peltó; esti gran paisanu morrió ayer nel hospital de Cagüeñes de Xixón a los 85 años d'edá. Nacíu n'Ouviñana (Cuideiru) el 24 de xineru de 1924, la so granible vida tuvo siempre venceyada a la mar, al deporte y a la poesía.

Aportara a Xixón con 12 años, escapando xunto la so familia de los batallones nacionales na Guerra Civil. Republicanu convencíu, al otru añu enrolóse como cornetín nel Batallón "Máximo Gorki", de Xixón. Nunca nun escaeció la so militancia política foi ún de los integrantes de Atenéu Republicanu d'Asturies.

Tres de la guerra, Peltó dedicóse al deporte y ganó bien dellos campeonatos de llucha llibre y grecorromana, llegando a ser Campeón d'Asturies siete años y Socampeón d'España en tres ocasiones, peleando nel madrileñu "Campo del Gas", centru entós del puxilismu y la llucha llibre n'España.

Pero la so rellación cola mar siempres foi más allá del trabayu; la mar fuera la so gran pasión. Peltó foi capitán de barcu, rescatador y un pioneru del bucéu y la pesca somarina. Rescató abondos barcos naufragaos, salvó un total de 81 vides humanes y descubrió bien de raques na costa asturiana. Tamién foi ún de los artífices de la creación de la Cruz Roxa de la Mar.

Pero Peltó cultivara tamién la poesía, siendo nomáu 'Poeta de los océanos' pola Fundación Titanic. Anguaño yera presidente de l'Asociación d'Amigos del Muséu d'Ancles de Salinas "Philippe Cousteau", qu'elli mesmu impulsara. Pasó bien de temporaes na Playa San Pedru la Ribera, en Cuideiru, au vivía na ponte d'un barcu fasta que la Llei de Costes y l'Ayuntamientu pixuetu obligáronlu a dexalu.

Remembraremos les dos entrevistes que con elli tuvimos; la verdá, prestaba abondo sentilu falar de la mar y de les sos aventures nos raques. La semeya ye de la primer entrevista que-y fixeron Teca ya Isidro nel Café Dindurra de Xixón el 19 de setiembre de 2006. Al final, quedómos ensin facer la entrevista filmada que dexamos apalabrada... siempre na nuesa alcordanza!.

> Noticia esbillada d'El Comercio y LNE.

Gracies, Isidro!.