Delimitóse l'entornu de proteición de delles cueves llanisques con arte parietal

Pintures rupestres de la Cueva'l Pradón o de Valmori (Llanes).

La Conseyería de Cultura ta acabante publicar nel BOPA l'entornu de proteición de delles cueves llanisques con manifestaciones d'arte rupestre, tanto pintures como grabaos. Son les cueves de Tebellín, Tempranas, Cuetu la Mina, La Riera y Trescalabres -nel macizu kársticu de La Llera-, la Cueva de Samoreli -ente L'Allende Vibañu y Rales- y la Cueva de Cordoveganes -en Puertas de Vidiagu. Estes medíes de proteición súmense a les yá publicaes pa otres cueves del Conceyu Llanes con manifestaciones d'arte paleolíticu (como les cueves de Valmori y de Quintanal -entrambes dos nes cercaníes de la localidá de Valmori, en La Llera- o la de Las H.errerías -en La Pereda), y vendrán seguíes de la proteición d'otres cueves con arte parietal paleolíticu qu'entá nun tienen delimitáu esti entornu de proteición.

Les cueves que l'entornu de proteición acaba publicar el BOPA son cavidaes que cuenten con muestres d'arte parietal bastante modestes (puntuaciones, claviformes, grabaos lliniales dixitales y de surcu fondu, figures animales aisllaes, etc.) y que polo xeneral nun son mui conocíes pol gran públicu, pero que nun siendo grandes "santuarios rupestres" son de muncho interés pa los especialistes y pa toos aquellos que, d'una manera o otra, tamos interesaos na prehistoria del Oriente.

Sicasí, el PSOE y el PP de Llanes alcordaron xuntos considerar escesiva la proteición planteada pola Conseyería y pretenden que l'entornu de proteición quede namás que cincáu al espaciu afeutáu poles cueves, lliberando más de trenta hectaries del espaciu que'l Principáu mira de protexer. Como nun podía ser d'otra manera, estos partíos tienen los sos propios planes pa estos terrenos de La Llera: unos, contruyir un polígonu industrial, otros una "ciudá del motor". La noticia en: La Nueva España, El Comercio y La Voz de Asturias.

Más info:

> Resolución de 05/11/09 de la Conseyería de Cultura y Turismu, pola que s'aprueba l'entornu de proteición provisional conxuntu pa les cueves de Cuetu la Mina, Tebellín, Trescalabres, La Riera y Cueva Tempranas, nel conceyu de Llanes.

> Decretu 20/2010, de 3 de marzu, pol que se delimita l'entornu de proteición de la cueva La H.errería, en La Pereda, nel conceyu de Llanes.

> Resolución de 11 de xineru de 2010, de la Conseyería de Cultura y Turismu, pola que s'aprueba l'entornu de proteición provisional pa la Cueva de Cordoveganes, en Vidiagu, conceyu de Llanes.

> Vía Pablo Solares (SEB Escar).