Con "Al Filo", esta vuelta en Mallorca

Filmación de raques y cueves somorguiaes en Mallorca, na seronda de 2006. Semeya: Teca

L'equipu de merguyu de la productora de programes pa Televisión Española (TVE) "Al Filo de lo Imposible", formáu nesta ocasión por Xisco Grácia, Bernat Clamor, Pere Miquel Garmundi, Mariano Izquierdo, Josep Guarro, Enric Maestre, Josep Maria Castellví, David Pérez, Mike Madden y los miembros del Ensame Aguarón Carmen Portilla, Javier Lusarreta, Isidro Baides y Xesús F. Manteca, ta filmando, dende'l pasáu día 25 de setiembre, un nuevu documental na islla de Mallorca.

Les cueves somorguiaes del sureste de Mallorca constitúin anguañu'l sistema somorguiáu con mayor desendolcu d'Europa, con más de 10.500 metros topografiaos en sucesives campañes por espeleomerguyadores mallorquinos y galeses. Mentantu'l rodaxe les imáxenes probaránse dellos prototipos de focos de la firma navarra Barbolight.

A fecha 1 d'ochobre de 2006, Javier Lusarreta destaca d'estos sifones que «son cueves n'orixe aeries, enllenes de formaciones, qu'anguaño tan inundaes. La capa superior ye d'agua dulce, y per baxu, agua salao, pues toles cueves allúguense averaes a la mar. Na zona na que les dos tribes d'agua se mecen, produzse una corrosión importante por mor del carbonatu cálcicu, lo que tien reflexu nes formaciones de la cavidá. La visivilidá nun tien llende, ye increyible. Filmando nuna sala de 300x70x15 metros vése too... Ye una pasada. Nes filmaciones tan usándose un focu HMI de 200 w (unos 1000 w halóxenos), dos halóxenos de 400 w y otros 5 de 100 w; vamos, ¡que se fai de día!. Yá hai una montonera minutos grabaos utilizables, y agora mos dedicaremos a filmar les partes que xunen la historia que se cuenta nel documental. Too va bien, Mike Madden ye un fiera filmando y, nel agua, ensin comentarios... La xente d'equí ye perprestosa y hai perbona sintonía ente'l nuesu equipu y ellos».

El prósimu día 9 d'ochobre incorporaráse a la espedición Xesús F. Manteca (Teca). A metanes d'esti mesmu mes d'ochobre, l'equipu treslladaráse al Cap Formentor pa mirar de filmar los raques de los destructores italianos fundíos el 11 de setiembre de 1943 qu'agora descansen ente los 95 y 100 metros de fondura. Cerca d'estos raques atópase tamién el somarín español B-1, qu'entamó a servir na guerra d'Africa en tiempu de Primo de Rivera y Alfonso XIII, fundiéndolu como buque blancu nos años 40.

Na prósima serie de programes que prepara "Al Filo de lo Imposible", qu'entamará a emitise per Televisión Española (TVE) n'avientu de 2006, podrá vese esti documental xunto col fechu en xunetu l'añu pasáu nel Manantial de Los Zarzalones, en Málaga.

>> Dende Espeleoastur seguiremos esta espedición y vos diremos dando anuncia de les novedaes sigún se vayan produciendo.

>> Pica equí pa saber más de los raques italianos "Pegaso" ya "Impetuoso", y tamién del somarín español B-1, toos ellos fundíos cerca'l Cap Formentor (Mallorca).

Información iguao y facilitao por Teca y Javier.