I Axuntanza d'Espeleólogos Asturianos

Los conspiradores y perxuraos participantes na hestórica espicha. Pica na semeya pa ve-yos la cara.

Tres bien de tiempu ensin saber unos d'otros, a la fin el pasáu 26 de mayu celebramos na Sidrería El Candasu de Xixón una axuntanza d'espeleólogos asturianos pertenecientes a estremaos clubes. La prestosa espicha valió pa tornar a los nuesos vieyos y bonos vezos: ponenos al día, ver delles semeyes de los proyeutos nos que andamos trabayando y, en dellos casos, bilordiar, esparder llevantos o reanudar contautos muncho bien interesantes y que nunca nun hubieron perdese... FASE o DESFASE pel mediu. Aguardamos qu'esta nun seya la última y, polo que mos toca, convidámosvos a toos a participar y esperder los vuesos proyeutos y actividaes al traviés d'esta páxina, que persabéis abierta a toos dende'l principiu. ¡Un saludu y hasta la prósima, vémonos pel monte!.

Lo malo d'estes pipes automatizaes tan modernes ye que nunca nun sabes si vas ser quién pa escosales o si les tienen enganchaes direuto al depósitu'l llagar!!. Val más nun apostar nada, por si acasu...

Les nueves teunoloxíes facilítenmos agora muncho bien el llabor de proyeición de los nuesos trabayos, nun ambiente la mar de prestosu!.

> Y un agradecimientu especial a Fran, pola perbona iniciativa que tuvo y el so eficaz llabor d'organización.