Krúbera-Voronya: -2.158 m

Helicópteru accidentáu en xineru de 2005 cuando tresportaba material a Krúbera-Voronya. Semeya: Cavex Team

La cavidá más fonda'l mundu, sigue afondando. Estos son los resultaos de la cabera espedición de l'Asociación Espeleolóxica Ucraniana (Ukr.S.A.) a Krúbera-Voronya, finalizada recién el 20 setiembre:

1. Ramal "Nekuybyshevskaya": Depués de los trabayos de destorgue desendolcaos nesta espedición, aportóse per esti ramal a -1004 m. de fondura (resultáu provisional), quedando la esploración na cabecera d'un pozu por falta material.

2. Ramal principal:

2.1. Aporte de -1.710 m, xunta la salida al coleutor, nel ramal que lleva a -2.000 m. Vacióse'l sifón que torgaba'l camín galería arriba, pudiendo esplorar 150 m de desendolcu y +20 m en vertical, aportando a un caos de costeros que torga'l pasu.

2.2. Sifón de -1.770 m. Volvió a trabayase nesti sifón, que fuera trespesáu n'agostu de 2004 fasta -10 m (na mesma espedición na que s'estableciera'l récord del mundu en -1.840 m de fondura y se descubrió la vía qu'aportaría a los -2.000 m), baxando 9,6 m. Nesti puntu somorguiáu, destorgóse'l pasu colmatáu de sable, lo que valió p'aportar a una nueva galería somorguiada a 7,6 m de fondura, au un caos de costeros cierra'l pasu. El desendolcu la galería somorguiada ye de 25 m.

2.3. Galería tres del sifón "Kvitochka" (-1.980 m). Trabayóse nesti seutor con 18 botelles d'aire. Nesti quintu sifón, bautizáu como "Dva kapitana" entamaron los trabayos el 1 setiembre. El primer día percorriéronse -6/20 m. Na siguiente inmersión del día 3, llegóse a -17/40 m, parando la esploración delantre un costerón que torgaba'l pasu na galería somorguiada. Asina, la punta d'esploración quedó a -2.158 m nesti quintu sifón.

3. Nel aspeutu científicu, fízose una campaña perintensiva de toma mediciones de temperatura d'agua y aire nos ramales principal y "Nekuybyshevskaya", cuyos resultaos presentaránse bien ceo.

4. Nesti seutor prodúcense espectaculares cambios nos niveles d'agua, que serán oxetu de futuros estudios. De mano, puede proponese de forma provisional, que nos primeros momentos del desxelu, cuando son frecuentes amás les tones nesta zona, na cavidá xube'l nivel d'agua en tolos ramales fasta -1.700 m (!). Esto desplicaría que, por exemplu, na escomanada Sala los Espeleólogos Soviéticos (-1.710 m) desapaezan les güelgues de pasu nel suelu d'arena d'un añu pa otru.

5. Dalgunos datos sobre esta espedición:

Xefe d'espedición: Yuriy Kasyan.
Merguyador de punta: Gena Samokhin
Responsable los trabayos en Nekuybyshevskaya: Kirill Markovskoy
Participantes na espedición: 16 espeleólogos d'Ucrania y Rusia.

Información facilitao por Yuriy Kasyan, vía Sergio García-Dils. ¡Munches gracies!.

>> Más información na páxina oficial del Cavex Team.