Les llaceries del "Tercio Español de Pollença"

El Capitán Alatriste.

Teca, 22/10/06. «Hay dies que val mas garrar y metése en cualquier pulgueru a gastar el xornal. Enantes d'ayeri atopo la nikonos con condensación -quiero más pensar esto a que s'encharcara-, asina que nun puedo facer fotos nes cueves... Esto pa entamar... Ayeri vamos por fin pa Pollença, soplando un lebeche (vientu sur) na badía de Pollença, al abellu'l Cau Formentor.

»Tirámonos al agua pa merguyar nel "Impetuoso", que ta en 96 m. de fondura. Na superficie, entá agarraos a la boya fondéu, la cámara de Josep María Castellví, paez que nun va bien pero, a la fin, arranca. Baxamos y mentantu vamos ganando fondura voi, como siempre, cambiado de regulador. Too va bien. A -85 m. faigo'l caberu cambéu y, sorpresa: el regualdor de la mandrecha da mui poco gas. Sigo cayeeeendo dica -92 m. y equí nun me da nada de gas. Cambio al otru regulador y comprebo que te too abierto. Asina ye, polo que cuido ye un problema'l regulador. Cambio al otru y aviso a Castell de qu'entamo a subir. Él dizme que vien tamién, que la cámara nun va; asina qu'entamamos a subir. Enrique sige baxando p'avisar a Enric qu'albortamos la inmersión. Primer parada a -60 m. Cuando aportamos a -40 m., Javier y Vigarto, que güei tan de merguyadores de seguranza, escribenmos que l'andamiu nun s'esparexó bien y que tan les barres fuera les fendidures afayadices. Terminamos la inmersión (116 minutos) y, cuando entamamos a salir de -6 m. a la superficie, Enric diz que tien dolores
nel costazu. Vuelve a baxar y los dolores esapaecen. Asina delles vegaes, hasta que a la fin ye quién pa surdir sólo con delles molesties. Recuéyenmos y depués abellugámonos colos barcos nuna cala pa comer.

»Yá en casa, a Enric dámos-y el tratamientu d'avezu: una cerveza y masaxe. Escaecí comentar que tamos avezándonos al mou de vida mediterraniu de los patricios romanos, esto ye: masaxes vespertinos, compaña de moces vestales, vinos claros de la tierra, yaesu.

»Nun fina equí la cosa. Pela nuechi, Enrique quéxase de dolores nún brazu y camentamos que lo meyor ye llevalu a la cámara de Palma. Ellí pasó esta nuechi y diéron-y l'alta al mediudía, magar que tendrá que tornar el martes a revisión. Cuidamos que sólo foi un problema muscular y non hiperbáricu, pero asina tamos más tranquilos. Mañana tornaremos a los italianos.

»El conceyu qu'hai equí, conocíu pola xente'l llugar como "la Chusma del Puerto", ye:

»Javier Lusarreta, El Pérfido Barón de Lusarreta: qué dicir que nun te ya na imaxinación de toos.

»Enric Maestre, espertu en mecedures de gases: ye quién pa mecer TX 10/65 con cerveza y sidra al empar.

»Josep Maria Castellví, en llibertá condicional tres de ser condenáu en New York City por aparcar delantre una boca d'incendios mentantu la campaña'l "Republic". Anguañu cumple condena na Prisión Federal de Baton Rouge, Louisiana.

»Josep Guarro, anguañu en paraderu desconocíu, fizo d'intérprete mentantu'l xuiciu "L'Estáu de New York escontra Josep María Castellví". El fiscal del distritu pidía la llibertá, pero Josep consiguió un conderga para Castellví de 20 años.

»Daviz Pérez, el Zarzalonio, xunto con Enrique Ballesteros, tienen delles torgues a la entrada de ciertos llocales: "Uds. pueden entrar pero los moritos que esperen en el coche"... "Morito limpio, no daño, tamaño español".

»Mariano Izquierdo, l'home qu'enxamás se despeina.

»Xesús F. Manteca, empresariu de negocios de moral amplia. Anguañu trabaya nún estudiu filolóxicu sobre la interaición de les llingues del tueru galaicu-portugués, variante brasileira, nos Polígonos Industriales del Conceyu de Sieru (Asturies).

»Rvdo. Padre Isidro Baides, Capellán Xesuita. Tres d'un tiempu en misiones na provincia de Tonkin, foi llamáu a capítulu pol Xeneral de la Orden pola so estrema intelixencia coles indíxenes.

»Carmen Portilla, responsable de xuntar la escoria de los puertos mediterranios cola forgaxa de les brañes astures.

Esto ye lo qu'hai. Como diz ciertu señor calvu enllenu d'arguyu imperial: "Somos un tercio español"... Llamentablemente».